女友突然係東海堂買咗八件西餅，睇落五顏六色，都幾靚喎！但佢哋叫乜嘢名堂我就唔知喇！只係覺得 D 芝士蛋糕幾好味，但係女友話已經無以前咁好，芝士味唔夠濃，覺得只有芒果蛋糕可以保持水準，其他就麻麻喇！

同女友食晚飯，每人各要一份套餐。

女友揀芝麻泰香雞，同埋豆醬炒時菜。雞有雞味，肉夠滑，幾正喎！但係 D 炒時菜就普通料，跟餐甜品係椰汁南瓜西米露，味道一般喇！

我揀咗咖哩羊腩，但係差唔多三分二碗都係骨，好搵笨，咖哩唔夠香，羊亦唔夠羶，D 味道麻麻地。甜品亦都好唔掂，件南瓜糕有『縮』味。

我同女友最愛那份蝦片小食，鬆化香脆，帶少少辣，正呀！！

同朋友係摩士打完波後，就去呢間酒樓食宵夜。

椒鹽坭鯭仔，香口惹味，但係份量少咗 D。

碧綠妃蚌蝦仁，味道好一般。

鳳梨咕嚕雞球，呢碟嘢唔掂，D 咕嚕雞球應該叫咕嚕雞片，唔香脆兼有 D 韌。但咕嚕汁嘅味道還算 OK，唔會太酸。

帶子蟹肉燴伊麵，只見帶子，唔見蟹肉，味道清淡，勝在夠大窩。

四個人，連埋啤酒茶芥，平均每個人都係五十蚊鬆 D，都算係抵食。

雖然呢間食店叫做『新疆回族薄餅店』，但係是一間印度薄餅店，亦是由印度人主理，唔明掂解會改嗰咁嘅名。

我就買咗羊肉捲及羊肉串試試，有香濃咖哩及羊肉味，不太辣，味道唔錯喎！而且價錢都唔貴，下次再經過，可以買 D 俾女友食。

好多時花生醬西多士係即叫即有，但係嗰日就要等十分鐘。西多士係新鮮出爐，口感、味道都唔同哂，熱辣辣，又脆又香口。食過咁多次大家樂西多士，今次係荃灣廣場食呢件最正，最超水準。

我都好鍾意幫襯商場 Food Court，多嘢揀又唔使點等。所以當晚我就幫襯咗一檔叫『九里香』，要咗一份鹵水什錦肉臊飯套餐（有時菜、有湯），再加一碟迷你蚵仔煎蛋。碟飯味道唔錯，餸菜都好入味，肉嘅份量又多，啱哂我 D 胃口。蚵仔煎蛋都好香口，幾好味。

但係呢檔嘢有位阿姐 D 服務態度就好唔掂，燶口燶面，做嘢做到發哂晦氣，動作好粗魯，將碗湯（雖然係味精湯）倒瀉係托盤，攪到一塌糊塗，都懶得理，當無事發生過，諗起都有 D 眼火爆。留低呢 D 員工只會幫老闆倒米。

約咗朋友係 MK 飲茶吹水，原本想幫襯海港燒鵝，實在太多人等位喇，焗住轉咗去煌府。我哋叫咗九款點心，有瑤柱菜苗餃、金蒜墨魚仔、黃金流沙包、鮑汁鮮竹卷、黑椒牛仔骨、北菇棉花雞、白菌雞粒盞、蘿蔔千絲酥，仲有招牌叉燒腸。

點心味道都係好普通，唔及得上次係利寶閣咁好味，唯一可以讚嘅係流沙包，D 餡真係幾流沙喎。三個人食咗百一蚊，都算幾抵。

同朋友睇完示範單位去利寶閣飲下午茶，叫咗幾款點心，有蟹籽燒賣皇、鮑魚棉花雞、千層馬拉糕、海皇灌湯餃、鮮蝦腐皮卷、芒果凍布甸，仲有金牌脆皮蝦餃。

D 點心味道唔錯，尤其要提提嗰款金牌脆皮蝦餃，係佢哋嘅得獎點心。D 蝦餃炸過，食落 D 蝦餃皮煙煙韌韌，又唔肥膩，真係幾正喎，下次可以同女友嚟食嘢。

同女友行百貨公司，跟住去對面呢間杏花樓食番 D 嘢。我哋要咗海底椰涼粉、XO醬炒腸粉，仲有臘味蘿蔔糕。

海底椰涼粉食落好爽滑，加咗椰汁真係幾正，仲大大碗，讚呀！！

XO醬炒腸粉好鬼惹味，真係仲想食多碟。

蘿蔔糕味道都幾好，都有 D 料，唔會好似淨係食舊粉。

女友一早就想試呢間甜品店 D 低脂乳酪甜品，所以係下午茶時間去幫襯，我哋要咗一份套餐，包括咗低脂鮮果綠茶乳酪、生果乳酪蛋糕、仲有一杯乳酪 Latte。

綠茶乳酪可以揀三樣 Topping，我哋揀咗提子、芒果、士多啤梨，食落 D 乳酪好滑，綠茶味幾濃。嗰件蛋糕味道好普通，杯 Latte 咖啡味淡，兩樣嘢都冇乜特別。呢份套餐要 HK$61，我就覺得唔係咁值，試過一次就算喇！

睇完戲想飲杯嘢，所以係呢間咖啡店買咗杯 Tofu Suzuccino。其實呢杯嘢都幾特別，係用水豆腐、（唔係『百福』豆腐噃！）牛奶、雪糕，仲有碎冰打成。

飲落豆腐味好濃，味道唔錯，又夠冰凍，唯一可惜就係打得唔夠滑囉，仲有 D 大粒冰。

行過呢間中式包點舖，見到幾多人係度買包，所以買咗件鮑魚包試試，件包好軟熟，餡裡面有冬菇豬肉，仲有兩大片鮑魚。鮑魚 D 味好似罐頭鮑囉，味道唔錯呀，下次有機會可以再試吓其它嘅包。

好多人都讚呢間燒臘店 D 叉燒好正，所以同女友特登嚟試試。我要咗一碟出名嘅叉燒飯，女友要咗燒鵝瀨。

D 燒鵝，皮已經唔脆，肉都算軟滑，味道就一般。至於 D 叉燒食落都係好普通啫。唔知道係唔係期望過高，反而覺得 D 味道冇乜特別。

與女友去睇戲，經過呢間雪糕店，女友話好想試試佢哋嘅 Milk Shake。所以就買咗一杯焦糖香蕉奶昔。（口味任顧客揀選。）

飲落都幾滑，香蕉味嘟好濃，但係我就覺得唔夠杰囉，我鍾意 D 杰他他比軟雪糕稀少少嘅 Mike Shake。而且呢杯 Mike Shake 要賣三十九蚊覺得唔係好抵囉。

呢間糖水舖好特別，除咗賣糖水仲賣埋香水。女友叫咗一碗凍生磨棗香合桃酪，我就要一碗生磨黑芝麻湯丸。合桃酪嘅口感幾滑，味都好濃，但係紅棗味就淡咗 D 。黑芝麻湯丸 D 味道有 D 似寧波湯圓，食落煙韌，芝麻味道好濃，薑汁糖水亦都係落足料，飲落辣辣地，好暖胃。

因為落雨，所以就係左近食晏晝，女友叫了一份拉麵加豬扒蛋飯午餐。我就要咗一份牛肉飯。

拉麵爽滑但唔夠煙韌，吉列豬扒已經腍哂，味道普通過唔普通。牛肉飯亦都係一樣，覺得份量少咗 D，所以未食完就諗住去邊度食下午茶喇。

雖然佢哋 d 麵包以健康做號召，可能唔係出爐時間喇！麵包款式唔多，冇乜好揀，所以買咗兩包 Cookies。

開心果曲奇好鬆脆， d 果仁味好濃，味道唔錯。乾果麥芽餅，食落煙煙韌韌，有咬口，比開心果曲奇仲好味。

與女友食晚飯，去咗聘珍樓，氣氛同一般酒樓唔同，食中菜但係環境就黑孖孖，仲有人彈鋼琴，好似食西餐咁。

我哋叫咗燒汁蝦球、士多啤梨骨，仲有竹笙茄子豆腐煲。D 蝦球好爽脆。士多啤梨骨食落酸酸甜甜，味道比生炒骨清新開胃。至於豆腐煲，味道非常好，布袋豆腐夠滑夠新鮮，正呀！！

每次行經麥記都見有人幫襯，見 D 人都好似食得好好味，所以買咗生煎窩貼試試。

阿姐問我：『要唔要落 D 醋呀？』我話：『好呀！』點知咁就出事喇！

窩貼味道唔錯，皮厚薄適中，又有肉汁。醋就唔係好掂喇！食落鞋口鞋脷。早知唔要好過。

與女友去行吉之島，行咗兩個多鐘，人都散哂喇！見此蛋糕店有座位，一於入去坐一陣。因為唔好意思齋坐，所以就買咗件綠茶朱古力蛋糕俾女友。

女友話件蛋糕好鬆軟，忌廉裡面 D 紅豆夠腍，綠茶味好濃，濃得嚟又冇苦澀味。好正。

但我就覺得有 D 奇怪，問女友：『點解唔見有朱古力嘅？』

女友指著 D 細細的綠色碎片：『傻瓜，lee D 咪係朱古力囉！』

睇完戲，有 D 餓，於是去大家樂食個下午茶餐，要咗個越式肥牛湯河粉加咖啡。

當一見到碗湯河就知道唔對路，得兩、三片細細薄薄嘅牛肉，D 味精湯底又好肥膩。最不知所謂，就係用洋蔥代替咗芽菜仔，唔知話佢有創意呀，定係亂咁嚟。隱陣 D 以後嘟係食番西多士好喇！