由朋友介紹而首次到"一門" 晚飯。這間日本餐廳的裝潢很有日本的味道, 走進店子的那一刻開始, 我日式料理的"食指" 已經蠢蠢欲動。這完全解釋到"人靠衣裝, 餐廳靠格局" 的道理! 兩位朋友與我, 3人點了數串燒物、石頭飯、豆腐及飲品等, 全是水準之作, 味道洽到好處。清靜舒適的環境也是我喜愛這餐廳的另一原因, 我們3人更暢談了兩小時之久。唯一不甚滿意的地方, 就是侍應們不斷重複經過我們桌子, 而且每次都對我們凝視許久, 生怕我們有所缺那般.... 服務"太殷勤" 而忘了要留一些空間給客人。

尋晚自己一個人係銅鑼灣行完街(買xmas野)，諗住去食峰壽司，點知兩間都排哂長龍，我一個人都可能要等半個鐘以上，所以就退而求其次，去左隔離個間御家到食。晚市都唔算好多人，9點鐘都係得一半入座率，所以都無抱太大期望。首先食左碟三文魚，望就好靚好新鮮，但食落就無咩味，得個平字。
帶子壽司一樣，雖然好大隻，但又係無咩味道可言，一0的都唔鮮甜。
比較好食0既係牡丹蝦同蟹子沙律，平時食開牡丹蝦最平都要$20，但呢到$15就食到，隻蝦仲幾爽口，唔錯！
而蟹子沙律就好大碟，有好多蟹子同蟹柳，唔似一般淨係得一大堆生菜青瓜絲。
餐牌上面話有不同時令的魚生供應，仲係由日本築地空運到港，不過價錢比較貴，所以我就無食到。今晚食左5、6碟，大約$100左右，不過不失啦。

自從和民愈開愈多，香港都好似多左好多居酒屋形式0既日本餐廳，不過個人就唔太鍾意和民，覺得野食細份得可憐，而且唔見得好食，所以對呢類居酒屋都無咩好感，除左呢間笑笑居樂屋。

笑笑同和民好似，不過野食就好食好多，而且選擇都多0的。其實已經黎過好多次，最鍾意0既都係蛋包飯、泡菜炒飯、脆皮豆腐、牛油燒帶子同Sukiyaki牛肉鍋。蛋包飯隻蛋好厚，唔係一般薄薄一片，個茄汁飯都好夠味。泡菜炒飯就有好多泡菜，香香辣辣咁非常惹味。日式脆皮豆腐真係做到好似menu所講外脆內軟，Sukiyaki牛肉鍋更加係每次必食，最鍾意食吸收哂香甜醬汁0既牛肉、豆腐同香蔥，不過唔好甜0既朋友可能會覺得佢過甜。最特別係笑笑有VIP房，仲有埋卡拉ok設備，每次去親都見到有人開P，所以一班朋友係到gathering都唔錯，因為佢仲有幾十款日本酒同雞尾酒供應。

好耐之前同屋企人黎食過，只記得野食0既份量好大同好heavy，而且價錢偏貴，所以一路都無再食過。最後有朋友話佢join 左Ruby Tuesday個vip membership，全部野食有半價，所以就即刻拉埋男朋友黎食。
原來男朋友之前同過朋友黎食，話個beef burger好好食，所以我地今次都係叫呢個，加埋一間蕃茄蜆肉意粉。同waiter落單0既時候，佢問我地塊牛扒要幾成熟，原來佢地0既burger 係用成塊牛扒去整架。最後個burger同意粉黎到，真係俾佢地嚇親，大份到不得了！尤其是個牛肉漢堡，塊牛扒足足有成吋厚，chef 幫我地將個包切開4份，啖啖都係好香0既牛肉，但我食左1/4已經覺得飽飽地啦。蕃茄蜆肉意粉都無令我地失望，好濃郁0既蕃茄汁，蜆肉都多到成個碟滿哂，加上面頭鋪滿一層蒜蓉，味道配搭得0岩0岩好，仲愈食愈開胃。結果我就主力食意粉，而男友就食哂個burger。我地知道呢到個tallcake好出名，不過由於已經太飽0既關係，最後就叫左shortcake，不過份量依然十足，仲有好香濃0既朱古力味。如果正價黎食真係有點兒貴，我地用左朋友0既vip卡，半價之後埋單盛惠$200幾，今餐真係滿足到行都行唔郁呀。

昌記可能午飯會比較一般, 但不得不讚既係佢下午茶既多士, 真係爆好食, 油沙多係好食到冇輪. 另外熱奶茶沖得唔錯, 唔澀得黎茶味好重, 我敢講係下午茶至尊!

是日同幾個朋友去跑馬地間有骨氣食晚飯, 聽個名咁型就諗住試下, 寫$88蚊既任食邊爐賣單大概$130蚊, d 肥牛真係勁好食!雖然每次叫都俾得好少, 不過d quality 係好過出面好多任食火鍋既肥牛, 豬骨湯底都夠濃, 加左兩次水都仲有味, 港島區叫做唔錯啦!

熱食涼面米線
我好鍾意食米線，近來尤其喜歡去有好多間分店的雲南過橋米線，因為佢個涼伴米線（即乾身）超正，可以揀凍食或者熱食。$20一碗加個?就$3-$5，羅白一定要試，因為每次食都好嫩同鮮甜（雖然我懷疑佢浸過冰糖水），而米線本身亦好好咬口。但係我有次飲?個金柑水就差到爆，雖然有成5粒金柑以為好抵，但係好似石頭咁硬篤極都唔爛，仲要得支膠羹，真係好想鬧爆佢！

抵食泡飯
嘩，我個日行過葵通廣場連住新都會條天橋附近，一連幾個嬸嬸派傳單狂SELL旁邊幾間食店，我同朋友敵唔過她們的熱情，終於試了那間泡飯店。我覺得幾抵食，因為廿零蚊大大碗，又好味，最好係有大量揶菜同雜豆，好(o岩)女仔口味，而且加$5就有?飲，真係抵食，不過環境就麻麻地。

幾年前係九龍城幫襯過，印象中幾好，今日路過又試下。來呢度一定食招牌牛肉麵，最好味是個紅白蘿蔔湯底，真係好清甜，似屋企果種，牛展都炆得好腍，平時少食牛展的我都掃清光！今日仲試了個雞絲蛋卷，層蛋皮好香，入口煙煙韌韌，有少少似食pan cake，都幾得意，可以再試。

超舒服餐廳
有人話A1 Cafe的chess cake好得，立即走?去葵芳新都會試下。果然唔錯！
我不嬲都好鍾意食A1的面包，從來都唔知原來佢有Cafe。個芝士蛋糕冇令我失望，好味得來緊要唔太甜，感覺好似健康d咁。全程我最enjoy的就係個環境，因為係戶外，真係好舒服，尤其衣家涼天氣，無得頂。

好多年沒有去過了，最近再去，地點是灣仔合和那一間。
一行四人坐到梳化位，都幾舒服，打開menu，發現部分食物可分為family size同lite size，其實有d main courses叫lite size已經可以，不如慳返d錢。食物幾實麻麻，送的麵包唔鬆軟，外皮又唔脆，其他食物只係非常一般，蒜香意粉勁多油﹗最好味的係甜品，係朱古力tiramisu，好濃好滋味，都可以一試。
平均消費：$10-$150

去過兩次，一次是lunch buffet，一次是dinner buffet。兩次感覺都好好，首先環境好吸引，開揚的餐廳佈置，加上外面有一點園林景色，感覺冇一般酒店餐廳般侷促。餐廳又將所有食物排在一條長通道的兩旁，感覺上好似行極都行唔完，陸續有來。食物方面的選擇好多，冇石破天驚的食物，但真係應有盡有。上次去仲見到可以自製沙冰，吸引唔少人去玩。另外一個抵讚心思位，餐廳附設一個小朋友專區，食物檯都特別造得低一點，放了一些容易夾的?喱糖、蛋糕、棉花糖等等。有帶過小朋友去食buffet的話，都知小朋友成日爭住要一齊去?食物，但又唔夠高，大人亦唔放心，呢個小朋友專區就令大人好放心，可以俾小朋友滿足一下自取食物的樂趣。
平均消費：$350

這是我去apm吃飯的best pick﹗
朋友都好喜歡去，第一環境舒服，裝修及氣氛不俗，入到去雖然放了好多張檯，但都沒有壓迫感。食物係香港人口味的意大利菜，又有套餐揀。老實說沒有十分驚喜的菜式，都是見慣見熟的意大利菜，但整體食物水準頗佳，pizza餅底薄而脆，pasta也不錯，最喜歡是點菜後送上的一籃麵包，一籃中有幾款選擇，外脆內軟，唔知係咪自製，但好有homemade feel。
店裡的服務也幾好，而且普遍反應敏捷，如果想觀塘一帶吃好一點的西餐，roma roma是不二之選。
平均消費：$100-150

環境頗佳的一間上海菜餐廳，坐得很舒服，也很適合一大群人gathering食飯聚舊。如果和家人去apm吃飯，要選中菜的話，這間會是我的首選。但大熱天時千祈咪坐近落地玻璃那邊，肯定熱死﹗況且窗景只是觀塘一堆舊樓，看不看也沒所謂。食物水準ok，小籠包及菜飯都不錯，尤其喜歡樟茶鴨，上次和家人點了這道菜，雖然要等，但鴨肉很入味、很香，所以大家吃得一件不剩。不過我覺得不用叫飲品，因為一杯豆漿、薏米水都廿蚊，太貴，飲水好過。如果想去呢間餐廳食飯，記得訂位，因常常爆滿，午市及晚市也超旺﹗
平均消費：$100-150

今日同朋友去biergarden，好耐無來過，依然好好feel，例牌飲德國啤外，更點了鹹豬手、煙三文魚沙律同小食拼盤做晚餐，個鹹豬手燒得剛剛好，皮很脆，肉也很嫩，但分量很大，沙律及小食拼盤普普通通，最好食反而是送酒的炸薯角和雞翼，勁香口，不過呢度服務好一般，其中一個女侍應成日黑口黑面，加水都要叫幾次，想去要有心理準備。

之前聽人講呢間Gaylord是香港數一數二的印度餐廳，今日難得有人請，但試過後發覺高級只是裝修，間餐廳環境是好grand，好靚，同重慶大廈果d差好遠，不過食物好一般，我地叫了鐵板雞肉、咖喱雞、香草羊肉、菠菜芝士、烤餅，都出面果d到無乜分別，但價錢差幾遠，下次要食都試佢個buffet算。

試過呢間舖幾次，不過都係食宵夜，佢地有宵夜套餐，一種是食麵，一種是食地瓜粥，另外可選一款小食或甜品，埋單三十幾蚊，價錢合理，食過幾次不是差，但又講不上特別，不過分量都幾足夠，價錢又同茶餐廳差唔多，要在尖沙咀食宵夜可以考慮。

由細舖幫襯到搬大舖，但水準愈來愈差，早排有朋友提議去，點知都係出事。我地點了咖喱炒蟹、串燒、炒蜆、蝦餅同冬蔭功湯，個炒蜆d汁多到瀉，但味道淡茂茂，分量亦偏少，一上檯我地仲以為係人地食剩果碟，至少咖喱蟹就普通貨色，同其他無分別，連以為好好味的沙冰，依家都好淡味，愈食愈失望，下次唔會再去。

今日同兩個同事專程去北角街市熟食中心食飯，一上去已經覺得好熱鬧，尤其以呢間東寶特別多人，不過好彩臨近九點，不用等位。我地點了沙拉骨、黃金蝦、風沙雞同金銀蛋浸莧菜，最好味是風沙雞，面層炸蒜好香，送白飯一流，個沙拉骨酸酸地都好開胃，最差是黃金蝦，分量少，蝦又不是大，每人分得兩隻，總括呢度小菜都的不錯，但人多時好嘈，我地食完飯都拿臨埋單走。

自己不是Snoopy迷，來這間cafe是因為它很早已實行禁煙，有好多梳化坐，雖然是星期六晚，但人不多，環境比其他cafe舒適，不過食物和咖啡很普通，試了凍Mocha，朱古力和咖啡味幾平均，但無大特色都要收三十幾蚊杯，cheese cake也很一般，不過賣相幾靚，Snoopy迷可能會覺得好吸引，若對食物要求不高，其實這裡是個不錯的選擇。

已經幫襯過兩次，第二次去都無失望。環境的確唔錯，其實想坐裏面，因為可以聞到好香的麵包味，但兩次都係坐出面的仿「露天茶座」，好彩都幾舒服。呢度o既免費麥包好好味，好新鮮，做到外脆內軟。我o地三個女仔點了Ceasar Salad、卡邦尼汁煙肉意粉、番茄肉醬芝士長通粉同燒羊扒，因為意粉份量偏少，所以點四個菜剛好。兩個意粉軟硬適中，但個卡邦尼汁校得比較好，茄汁其實略酸。個羊就值得推介，濃味但唔會好羶，有肉汁。呢度服務都唔錯，侍應會不停加水，但隻杯太細，入兩口又要斟，要扣分。價錢在又一城來說算中價，人均消費約$120，都會再來。

尋日有事要到跑馬地，午飯時間，見間間餐廳的set lunch起碼五、六十蚊，最後選擇了這間懷舊咖啡室。雖然這裡很出名，但除了食過蛋撻做下午茶，食午飯都是第一次，見有午市客飯，選擇不少但不吸引，點了原味牛腩飯，牛腩炆得幾淋，分量適中，但不算太好味，杯凍奶茶太多奶了，味道偏甜，總括店子環境比食物吸引好多。

旺角麵店中，這家算是老字號，食物水準都相當好，最鍾意是這兒的招牌炸醬麵，用的是粗麵，有口感，肉是一條條的，味道很甜，很惹味，連一碗湯送上，湯是用大地魚煲的，很鮮味，見隔離檯有人食蝦子撈麵，看起來很像樣，下次都想試。

上個月特登上山頂同個老友慶祝生日，原本想食阿甘蝦餐廳，但老友嫌太早收未夠盡慶，最後去了收得較夜的Cafe deco。我地點了亞洲式頭盤拼盤，四個小食都普普通通，主菜要了牛扒同羊扒，兩者都有水準，另外我地見做梗$10隻特價澳洲生蠔，諗住點半打試下，隻生蠔望落細細隻，但好甜好爽，之後我地仲叫半打分享，兩個人食了九百幾蚊，都幾貴，但一年一次都ok，同埋呢度d侍應幾nice，見有窗口位仲主動幫我地調檯，好體貼。

一間好耐先會幫襯一次的餐廳，咁耐無去都無走樣，最鍾意食呢度的吉列豬扒，塊豬扒好鬆化，皮好薄好脆，肉又好滑，有肉汁，同埋最欣賞是可以任添椰菜絲，食落感覺好似無咁熱氣，比出面好多日本餐廳正，不過一個套餐價錢都幾貴，但都叫物有所值。

之前聽日本通朋友講，今日同屋企人去試，一個要fish burger，一個要和式漢堡，我就要炸雞漢堡，另外薯條、洋蔥圈同薯格share食。我哥話個fish burger好普通，比麥記好少少，細妹就鍾意佢個和風漢堡，個炸雞包都唔錯，但我地發現三個包都唔熱，同埋d料好似塞唔落個包度，飛晒出來，至於三樣小食好普通，不值一提，總括來講無人地講咁好食，但個包比mos burger大少少，至少食得飽。

去了兩三次，消費都幾貴，一般最低消費也要二百蚊一位，但食物及環境的水準不錯，所以都可以接受。這是一間樓上舖的火鍋店，環境乾淨整潔，裝修也很骨子，沒有一般火鍋店那種嘈雜和草根feel。這裡必吃的有三秒腐皮，把腐皮放在湯裡浸兩三秒，夾起即吃，非常爽脆，我本身不太愛吃腐皮，也覺得很好味。其他肉丸全是手打，夠新鮮彈牙。如果想打邊爐有一點新鮮感，可以來這裡一試，但地方不算很大，最好預先訂位。平均消費：$250

食物水平一般，但朝早有個雜扒早餐幾抵食，只係$23，有漢堡扒、煙肉、雞蛋、薯角、雞扒、豬扒，仲有一片生果、蒜蓉包，包飲品，仲要冷熱同價，男仔食份量都好大。
不過服務就九流，經常食物俾唔齊，試過三個人叫三個雜扒餐，人人的款式都略有不同，你同佢講佢又俾返你，但要三催四請。侍應生的語氣又好差，落單經常出錯，如果只為抵食，唔怕勞氣可以一試。平均消費：$30

任點任食火鍋算抵食，連埋湯底、茶芥、加一，每人七八十蚊一位左右。食物款式算多，調味料多達十多款，蝦醬、XO醬都有，而且服務不俗，以普通酒家級數來說，這個價錢及服務都算有誠意。同其他晶苑比較，這間環境算闊落、乾淨企理，裝修骨子，而且一般情況下唔需要等位，如果突然好想打邊爐，又訂唔切位，可以考慮下呢間。
平均消費：$100

"媽咪喜歡吃上海菜，一心來這裡吃刀削麵，但原來這裡是刀切麵，難怪形狀不同，不過都是我們自己沒小心看清楚，不是對方故意欺騙。價錢雖然比一般上海小店貴，但水準不俗，基本功夫做得幾好，不過上次吃了一條松魚，就有一點腥。建議最好一家人或一大群朋友去食，可以試多些冷盤、小吃及包點，如只得兩三人，可以吃到的種類實在太少。平均消費：$100

難得星期六一家人剛好放假，決定去食tea buffet。日航的lounge好幾舒服，我地對住落地大玻璃而坐，真係幾悠閒，可惜頭頂竟然滴水，有點大煞風景。可能因為是tea buffet，食物選擇比較少，只得十多款。我地當日的主題係芒果，有關芒果的款式發揮得淋漓盡致，芒果炒飯、芒果排骨、芒果雞翼……，仲有各種芒果甜品。我不算是芒果fans，但覺得佢地的芒果系列都幾好，唔會款款一樣味，部分更非常有水準。除了主題食物，另外亦有少量其他冷熱盤，當中一致獲大家讚賞的是冷麵，每碗份量少少，但冷麵在碗內蹺成一層層的圈，單睇賣相已好靚，質感、味道亦很好，大家都追住吃了兩三碗。平均消費：$150

原來朗豪坊對面開了個商場叫「旺角文華」，個名已經好笑，點知樓上呢間號稱「屎上最強」的餐廳仲好笑。客人要坐馬桶，食物用馬桶、尿兜、浴缸、洗手盆裝住。我知餐廳在台灣有好多分店，估唔到開到來香港。抬頭見到廁所泵及屎形燈，牆上仲掛滿尿兜同廁板，講真係幾得意，幾過癮，但呢o的餐廳去影一次相就夠，因為食物款式雖然多，但味道認真麻麻，仲要唔平，食個餐飲杯特飲，每人都要約$100。我o地叫了無鍚肉骨頭，有飯、湯同前菜，無鍚排骨算過得去，但太大塊唔知點咬，但個湯淡到似水，豆腐乾都係無咩味。另點了用尿兜杯裝的布丁奶茶，遠望真係得意，但近望覺得杯身污糟，奶茶好難飲，無茶味只有甜味及奶味，仲唔發現布丁，$35唔值租。

睇雜誌介紹知道這間舖有炭燒燒味，今日專程同屋企人來試，一口氣點了燒鵝、乳豬、叉燒，數個小菜和冬瓜盅。先說燒味，最好食是燒鵝，雖然上檯後不是熱辣辣，但鵝肉好滑，好香肉味，整體比深井食到的要好，叉燒蜜味適中，有肉味，也不俗。至於小菜好大路，不過不失，要彈是間酒樓好殘舊，感覺不大乾淨。

早幾日家姐個男朋友請食飯，去了這間幾高級的酒家，可能是星期五晚，樓上無位，經理安排我地坐下面，但個地方幾細，檯又多，坐得不太舒服，不過呢度的食物幾好食，我地點了花雕乳鴿、 豉油皇炒鵝腸、蝦子柚皮、半隻乳豬同豉油蝦，最好食是乳鴿，好香酒味，d肉都好滑，乳豬皮都好鬆化，食落又唔會太多油，不過碟蝦麻麻，豉油味唔香，總括來講水準同價錢(一碟都近七、八十蚊)都成正比。

開完OT由同事帶來，格局同一般雲南麵店差唔多，十六蚊可以揀兩選配料，我揀了燕餃同滷肉同酸辣湯底，個湯唔錯，酸辣都好平均，但個滷肉好肥，料又少，同事話佢個麻辣米線都麻麻，試o左少少都覺得普普通通，荃灣有好幾間店都好食過佢，幫襯佢都係貪就腳同開得夜。

初頭成日笑呢間店是抄小肥羊，誰知發現佢都有幾間分店。北角的分店沒有什麼裝修可言，都是很嘈雜，不過食物就幾有驚喜，同佢外表好唔相配。店內的特色食物係芝心牛丸、鵝肝牛丸，有新鮮感之餘，亦幾好味。試過叫一渣酸梅汁，竟然係台灣入口的獨立大支裝，幾原汁原味，比起自己煲的更濃，都係$20一支，感覺亦衛生。另一特色係有各種刺身供應，起初唔係太敢試，但賣相又幾ok﹗試過都唔錯，幾新鮮，有時仲有優惠，所以都可以一試。仲有佢有生果送，而且非常有心思，原個橙肉挖出來橫切成一片片，再砌番好放入半個中空的橙皮之內，食的時候只要拮住一片片橙肉就ok，完全唔需要用手，又保留到肉汁。不過呢間火鍋店消費略貴，閒閒地都要二百蚊一位，如果裝修可以提升，就會更加物有所值。平均消費：$250-$300

常常去apm逛，白木屋也去了好幾次，主要原因是收得夜，十二點去都仲營業。食物味道一般，份量比較少，種類選擇似魚一丁，但又不及魚一丁好(當然消費亦相對平一點)。白木屋地方好大，環境是不俗的，但最令我感到奇怪的是，每次叫鍋物，就會用gas爐上檯，話晒裝修都唔錯，一大個gas爐放在檯面，然後吃什麼「北海道鍋」，真是很沒趣﹗服務方面，普遍唔夠醒目，但又不算沒禮貌，只是常常要主動提點，希望可以多作改善。平均消費：$150

一間不起眼的北角小店，但食物非常有水準，各種意粉煮得相當好。個人最愛：蒜香辣肉碎天使麵、鮮蝦蕃茄沙律、蒜蓉包，其他朋友大讚薯仔沙律及蒜蓉包一流﹗不過店小太小，坐低吃油煙味太重，最好外賣。平均消費：$50

和朋友慶祝生日，一心想試試新BUFFET，於是揀了九龍酒店，但大家都有D後悔。先講環境，地方唔細，但一入去就覺得有一點殘舊，心諗三百幾蚊一位，好似渣左D。食物方面，款式算多，但唔知點解，大家都覺得冇乜見到會嘩一聲、非吃不可的選擇。唔可以話好差，總之食完感覺就係好一般，大家都覺得呢個價錢可以搵到食物更好、環境更好的BUFFET。平均消費：$350

睇佢外表幾闊落，裝修亦唔錯，以為有D保證，同家人入去飲茶，但D素菜點心好多都麻麻，連最基本的蘿蔔糕、芝麻糕都好差，夾起會散，而且芝麻味道好假。雖然我對素菜冇乜要求，但這樣的水準，加上消費又不是特別平，實在想不到為何還要再去。平均消費：$100

去過這裡吃宵夜自助餐很多次，價錢合理，加一大約150蚊，質素又有保證，比起其他酒店的宵夜BUFFET，帝苑是不錯的， 以前我去親都有生蠔，但早兩個月去，就冇左。同場有壽司、刺身、PANCAKE、生滾粥、各式冷熱盤及甜品。唔講得上有驚喜，但質素OK，至少環境、氣氛服務都令人舒服。個人推介必吃的有生滾粥，粥底夠綿，另外甜品也相當精緻，食多幾款甜品，都應該回本。平均消費：$150